Zingen is gezoond

Goat der eawn good vuur zitten om te leazen hoe het Riessens Mannenkoor (RMK) an ledenwerving dut.

Net as aandere koren hef ook het RMK te maken met griezige zangers en te weainig anwas. Vandoar da’w kortens nen moojen bedrukten folder in de busse kregen woer at de koorbobo’s op ne hele mooie manere reclame maakt vuur zingen in ’t algemeen.

In Riessen wordt der gemiddeld völle zungen. De tied van een harmonium in de kamer en ’s zöandaangs zingen um ’t örgel is preenspoal vuurbiej. Min groffa zung nog tweede stemme en gung vol-oet as het ‘gebukt bij tichelstenen neer’ (’n achtsen regel oet De Koningen hoe zeer geducht, Psalm 68:6 beriemd in 1773) an de buurte wes. Vearder in de koarkdiensten genog zang oet het psalmbook met Eenige gezangen of oet de Grote Koarke-Weerklaankbundel met honderden gezangen. 

Volgens het Riessen Mannenkoor maakt zingen de gelukshormonen endorphnine en oxytocine an en doar met he’j meender last van bangigheaid. 

Zingen oet de völle börste (deankt an de tichelders!) is good vuur de oademhaling, bloodcirculatie en zuurstofduurvoer doer oew lichaam. Zingen gef nen legern blooddruk, iej wordt der röstiger van en oewne immuniteit krig der nen opstötter van. 

Oet oonderzeuk blik det zangers zich mear good te passe veult. Zingen is good tegen depressies en eenzaamheid. 

A’j op een koor zit, doo’j wier met, iej doot nieje kunnigheaid op en het leaidt statistisch gezeen tot ne heugere leawensverwochting. 

Mear non koomp ‘t: “Uit sommige onderzoeken is gebleken dat muzikanten en zangers doorgaans een hoger IQ (klookheaidsgetal) hebben dan niet-muzikanten. Veel succesvolle mensen zijn ook muzikanten.”

Wat mu’k doar non met? At een koor succesvol is, dan is het gemiddelde IQ heuger as de Riessense doewenvereniging woervan at de gemiddelde leaftied heanig an boawn de 60 koomp. Met zukke oonderzeuken kö’j alns recht kuieren. Bevuurbeeld: “Veel succesvolle mensen zijn in bezit van twee auto’s” en zo verdan. 

Op de achterkaante van den RMK-folder steet börgemeaster Jurgen van Houdt, dirigent Jaap Kramer, vuurzitter Gertjan van de Moete, wethoolder Bert Tijhof en koorleider Arjan van Brussel. Allemoals gäste met ne goo bane of een hoog ambt. 

Zoln ze dan toch geliek hebben met det IQ…?

Gerard Voortman