Gerrit Kraa.
Gerrit Kraa.

Dichter

Columns

Zoaterdag 11 november, ’n elfden van ’n elfden, was nen biejzeundern dag. ’s Moarns um 11 uur was d’r nen woapenstilstaand van ’n Eersten Weareldoorlog. Vroger krege viej oetvoerig les oawer de victorie van Alkmaar, het beleg van Haarlem. Het ontzet van Leiden, alns oawer ’n Tachtigjoarigen Oorlog, mer oawer ’n Eersten Weareldoorlog, doaroawer heurden iej niks. A’j geluk harn wör d’r vuur-eleazen oet het befaamde book ‘Peerke en zijn kameraden’. En het kon wean dat d’r biej ’n heard verteald wör oawer de Spaanse griep, den noa dee slachbaanke van 1914 tot 1918 nóg mear slachtoffers opleaverden dan de miljoenen seldoaten ín den oorlog. In Riessen wörren vluchtelingen oonder-ebrach in het gloodnieje Parkgebouw. De leste tied verschient d’r films en beuker oawer den oorlog. Nen prachtigen film van 133 minuten doaroawer is ‘Un long dimanche de fiançailles’. En aans het book van Pierre Lemaitre: ‘Tot ziens daarboven’, oawer een poar soldoaten dee nóa den oorlog het leawen wier op mossen pakken, noar lichaam en noar geest behöarlijk vermeenkt.

Tjea, het leawen geet dom verdan. Nit allenig noa 1918, viej mut ook leawen met wat d’r in Oekraïne gebuurt en in Israël en de Gazastrook, en, kleanschaliger, in oons laand noa de verkiezingen…

En nog wat kleanschaliger zeent de dinge van elken dag. Want op 11 november in 2023, nit um 11 uur (in 1918 leaden ze op dee tied de woapens dale) mer um 4 uur was der ne presentatie van nen verhalen-dichtbundel van nen vuurmaligen dokter, ooit geboren in de Stellingwerven, maar al heemoas vergröaid met Riessen en de Riessenders: ‘Even op een bankje aan de Regge’ van dokter Slofstra, verlucht met foto’s van zinne wederhelfte Janneke. 195 bladzieden met oonderwerpen oawer ech van alns en nog wat, te völle um op te neumen. Iets moois vuur een cadeau biej de kommende feestdeage.

Jan Slofstra kan now op-enömmen worden as dichter in ne hele reeks van Tweantse dichters. Dichters met allenig gedichten in het Hollaands, of allenig in het Tweants, of van allebeaide wat. Hennik van ’n Scheenken, Rob Berg, Gerard Droste, Ben Frey, ik doo zo mer ne greppe oet de bokenkaste. Iej köant ’n kreenk nóg kleaner maken duur allenig noar Riessense dichters te kieken. Nemt Garrat van Drees, met de bundels ’Mooi Riessen’, of de verzameling limericks van Jan Zandbergen: “(S)limmerick of (S)limmer-iej?’” en nit te vergetten het omvangrieke oeuvre van Harm Agteresch, en de gedichtenbundels van Jan Rozendom (‘Rozebottels’) en Jannes Slot (‘Met weinig weure’). Tot besloet wat Jan Rozendom zeg oawer Riessenders:

‘Ze hebt an grote plaatsen lak 

Ze veult zik hier op eur gemak 

Want Riessen woer ze zeent geboorn 

Kan eur toch aajt het meest bekoorn’.

Miej ducht.

Gerrit Kraa