Keze en Worst 2024

Businessclubs te ballast in Tweante. Noarns mear businessclubs as hier in disse strekke. Zowat elke gerespecteerde foebalclub hef zonnen club, elke plaatse hef wal nen haandevol ondernemmers dee at zik verennigt. Iej hebt regionale clubs, plaatselijke, sectorclubs, iej hebt aoweral Industriele Kringen Tweante. Aj zonnen IKT bezeukt zee-j duurgoans aaltied hetzelfde volk en benaamd grieze leu, baankleu en accountants. Aoweral leazingen, aoweral een hapje, aoweral een drankje, aoweral bitterbälle, aoweral contributie. Aaltied ‘haj haj, leuk om je te zien en dan al wier noar een volgenden kieken’. 

Riessen hef bevuurbeeld de KWR. Dee vergadert in n Oosterhof en kent nog nen ballotagecommissie woer at vief leden een niej lid mangt vuurdreagen. Ook det is van anno heel lange leden. En mut allemoals gelikter. Businessclub Bij de Tijd (de club vuur kleainere bedriewen) vergaderen eerst biej het leegdreampelige Royal, mear non al biej het chiquere Brodshoes. Alló, fuseren met ’n kroam want tehope köj méar trechte kriengn.

De nieje tied dut det aanders. Dan krieg opeens een appje via oew telefoon woer at der nen ‘keze en worst aowend’ wordt organiseerd. Gin ingewikkelde intekenliesten of QR codes of streepjescodes’s , gin notulen, ginne opening. Gewoon een heel modern appje, woer aj precies koant zeent wat ze doot, hoe aj oew koant anmeelden, wee at der koomp, ook dreks een fotootje der biej. Heel simpel, heel doeltreffend, leeg dreampelig, gin statuten, gin ballotage, gin kösten, gewoon niks. En het meuiste det het allemoals in ’t plat geet. Op det appje zengt ze ‘viej neungt oew oet um te kommen. Iej weet nooit wee-j sprekt en waj der nog met koant. Viej hebt de duurn vanof zeuwn ur lös en viej doot hum wier dichte at de lessen vöt zeent’. Der steun ne melkbussen vuur ne vriejn gift en volgens miej konnen ze der roem met oet en ze hebt ook nog een fleenk bedrag aower e maakt vuur een good doel. 

Ze höngen de met de bene oet. Ik zagge eigenaren van grote transportbedriewen , der warn hoveniers, kökboern. Ik zagge ne zwoare delegatie van dee beaide concurrende wekkreantjes. Der warn Ketsen en Kuenzen. Ik zagge Kippers en kappers zoas vintage-Joop. Ik zagge SGP roadslid Ewart Bosma in een krietpak en nen knup vuur, mear – uniek !- zoonder lefdeukn. Zinnen fractiegenoot André Scheppink in businesscasual, spiekerbokse zoonder geater en doonkerblauw buiske, ook zoonder lefdeukn. Vanzelf een trouw bezeuker en onroerendgoedman Jan Harbers, disse moal met nen stok wesweage een niej knee. Der warn Haazens en miskien ook wal Kniene. Ik zagge Datsundealer Harry Beltman, mear ook Saab- Henk van de Neus en Nico Schippers. Ik missen duurstartcurator Wouter Weenink, Knetteroarndje en Jochem Beens. 

Ik missen ook vrouwleu, boeten de bediening umme. Dee zöalt de wichter wal noar berre doon, want het deelnemersveeld verjoonkt stöadig. Gin muziek, gin lauwe bitterbälle, gin discolechen. 

Jongs, dít is de nieje tied. Een appje, een betjen vriejgevöchen miskien, mear ook gin belachelijke belemmeringen van statuten oet de tied van vuur ’n oorlog.

Zo mut het der op an!

Gerard Voortman