Popiejopietaks

Noe toch wat moois doar in ’n Haag. Ze wilt rekeningrieden invoorn. Rekeningrieden, vuur leu wat de leste joaren de grotte neet oetewest zint, is et stelsel wat wil biejholden wo völle kilometers a’j in een joar veurt. Wo mear a’j jaagnt, wo mear a’j mut betalen. Zo kan der de algemene weagenbelasting achterhen. Dat zol earliker wean vuur leu dee’t neet zo völle jaagnt of helemoal ginnen auto hebt (de Amsterdamse bakfietsyup dus vuural) en alle dage op en dale goat met ’n trein of de fietse. Ik vinde der wal wat vuur te zeggen.

En zo kan ik nog wal wat mear initiatieven oetdreumen. Non hooft et van miej neet direkt ne Umweltzone te worden in Riessen, (doar mu’j biejvuurbeeld ne echte Hanzestad vuur wean), mer misskien a’w de riessender kas, den toch al oardig dikke is, nog op ne andere wieze köant spekken.

Wat noe — hold oe vaste — a’w nöast den tooslag ook nen taks vuur ’n umvank van de wage rekkent? En den dan liek-op loatt lopen met de verholding tusken de grötte en de noodzaak der van: He’j nen völs te groten bak vuur woer’j ne vuur gebroekt? Biejvuurbeeld enkel precies op nen zoaterdagmorgen, et drokste ogenblik van de wekke, hen bodskoppen halen? Klabats, ne flinke prente der oawerhen. Zi’j nen boswachter en doo’j met nen Landrover oawer de Sallandse Heuwelrugge de korhoonderkukens en eaverdasken kapot jaa- ehh in kaarte brengen? Ja, dan he’j zonne wage gewoon neudig. Dan zi’j nen besten kearl. Vriejstelling vuur oe!

Miej ducht, dan valt der nog wat te winnen, of nit dan. Zeker an dee oogzearten van amerikaanse hondehukke woerat wat Riessenders meant in rond te mutten jagen. Nen Dodge, Jeep of allens wat grötter is as woer’j fatsoenlik met op de Nederlandse weagen en parkeersteas könt geworden. Wiej neumt et dan de Popiejopietaks. Doar mu’j dan ook verplicht een joar met nen groten sticker van oawer de ziedkante rondjagen. En dee hebt wat oppervlak!

Lös van da’j een zelfzuchtig varken zint a’j zonne wage dörft an te skaffen en der dan ook nog op nen zoaterdagmiddag met op de parkeerplate biej de Jumbo vuur dörft te verskienen, loa’j ook nog blieken van nen slim onderontwikkelden smak. Nums in Nederland hef zukke grote wagens neudig. Nee, iej ook nit.

Nen RAM is de fatbike van de autobane.

Martin ter Denge