Psalm 25 vers 2

Min moo zung ’t aaltied oonder ‘t ofwasken. Ik heur ‘t nog: zachjes, earbeedeg en zuuwer. Völle koorn in Riessen zingt ‘t nog aaltied. ‘Heer ai, maak mij uwe wegen, door uw woord en geest bekend’. Vake op hele nootn. Ook in mennige koarke word ‘t nog regelmoatig ezungn. Dat zal gerus ook nog wal lange zo bliewn. Het woord ‘ai’ is ’n tuskenvoogsel, oonderdeel van ne smeekbede. Aj ’t good bekiekt steet der dus: ‘Ach Heer’. Het is oold Hollaands in de psalm-beriemege van 1773.

Mear, zo as zowat geet, rechtevoort hef ‘ai’ ook nog ne heel aandere beteeknisse: ‘artificial intelligence’, in ’t Riessens neum ik dat ‘keunsmoatige teuwelderieje’ (skriew-t mear op Mattn ter Denge, dat is dus ‘kt’). Da’s femielie van kww, ‘kiekn wat ‘t wordt’. lej vroagnt op ‘t internet wat en dan mu-j kiekn wat ‘t wordt. Bevuurbeeld ‘Skriewt ‘n mooi kort stukn in ‘t Riessens oawer de borgemeaster’ en dan krie-j dit:
 ‘De meeste leu kent burgemeester Jurgen van Houdt as nen betrokken man. Hee löp geregeld tusken de leu, kump bie activiteiten en hef oor veur wat d’r speult in de gemeente. Dat wordt deur völle inwoners waardeerd’

Iej zeet ‘t wal, dee keunsmoatige teuwelderieje mut nog ‘n betjen biejlearn, ech Riessens is ‘t nog neet. Riessens, Tweants en Hollaands duur mekoar. Mear ‘t verhaal oawer Jurgen van Houdt klopt netuurlek wal. 

Oojn minister-president löt ook vake breewe skriewn duur dee keunsmoatige teuwelderieje. Nen kearl van de Volkskraante veun doar wat van. Dat gaf nen hoop gekeukel: dat kon toch neet, ‘t mos toch persoonlijk en met geveul. Non jea, hee köm der in elk geval met op tillviesie. Mear Rob Jetten zea: viej kiekt ‘t aaltied noa en at oons nit akkedeert, passe viej ‘t an. Want ’t geet nit allene um de weurde, mear ook um ‘t geveul. 

Van miej mag Jurgen van Houdt ook gerus met dee keunsmoatige teuwelderieje breewe skriewn. Dan mut’e netuurlijk wal good kiekn of ‘t klopt en of zin geveul der nog wal in zit. Non, dat is Jurgen wal toovertrouwd. ’t Skealt miskiej nen hoop tied, mear ‘t hoof netuurlijk nit. En is de secretarie van de börgemaester dan woarkloos? Ach nee, dee hebt woark zat en dat doot ze good…

Mear hoe zit dat dan met dissen columnskriewer? Dat zo’j miskien wal geane wiln weetn, mear dat hang ik oe mooi nit an ‘n neuze. Skriewn det doo’k miskiej nog wal heel lange zelf, net as ’t zingn van psalm 25 vers 2. En met de boawnstemme… mear miskien ook wal neet…

En ‘ai’ miej nit gleuwt dan za’k oe de volgende keer wal wier aandere teuwelderieje vuurleegn.

Jan Poortman