Grötter deanken
Columns’n ‘Keze en wos oawend’ votspeuln met beer of Rivella he’w wier ehad. Dit joarlijkse geburen is vuur de gewone man en oondernemmers van duurgoans kleanere bedriewen. De organisatoren zeent Tweants bescheaiden en bloast doarmet nit hoge van ’n toren.
Der komt nit allene de kleanere oondernemmers. Wat ducht oe van onroerendgoed-tycoon Jan Harbers. Of Mark Voortman of wethoolder Ben Beens en börgemeaster Jurgen van Houdt. De zorgsector/erfgoeddeskundige Wim van de Bokse was der ook. Ik zagge Jan Tijhof van Polybouw, Ate Pultrum en curator Wouter Weenink. Zeker nit de kleansten, duch miej.
Biej dee keze-en-wos-oawende zeent gin leazingen of deepgoande workshops. Het is leegdreampelig. Tóch was der disse moal wál ene advies-sessie van nit meender as ‘n vuurzitter van de werkgeverskring én oondernemmer van óók een groot bedrief Arjen Jaansen. Jaansen heul een poar ondernemmers vuur det ze grötter mossen deanken. Oart mear lef teunen, doar wo’j better van, leek de conclusie. Arjen stimuleerdn Ronald Vrijenhoek van Videra Beveailigpöale ook um grötter te deanken.
Vrijenhoek dut met objectbeveailiging. Wee’j wal, biej bouwprojecten of op steas woer at het drok is, stoat vake zukke veerkaante bäkke en pöale vol met camera’s um oe in de gaten te hooln. Stel, iej hebt zonnen bevailigingspoal en der is biej oe in-ebrökken. Dan wil de politie gearne weten hoe late, met hoe völle man en watvonnen auto at dee inbrekkers biej zik hadden. Dan mu’j dus al dee beelden wierumme kieken. Saai en onangenaam woark, met de kaans a’j toch iets nit zeet. Det mos better, dachen Ronald en hee bedachen ‘Videra, ziet, waakt en beschermt’.
Zonnen poal neamp een helen dag 24/7 beelden dee a’j op talloze dingen köant loaten zeuken. Det gebuurt duurmiddel van AI. Ronald deed het oons vuur met den poal den at binnen steun en gaf hum de opdracht ‘zoek de personen die veel plezier hebben’. ‘Zoek diegene met een muts op het hoofd, een hoody aan heeft, een bierbuik heeft, cola drinkt, heel veel worst of kaas of beide eet’. Nit te geleuwen in watvonnen sneltreinvaart iej de gekste vroagen köant stellen woerbiej a’j dreks de wearlnd an beelden zeet.
Hee schakeldn nog eawn met den poal vuurboeten en gaf hum de opdracht ‘zoek een witte Tesla en zoek een witte Mercedes.’ Ronald zea det eur systeem völle schoarpere en completere beelden löt zeen en met AI kö’j gloepens fantaseren en loaten opzeuken. Zo as ‘welke bus rijdt verdacht vaak langs ons bedrijfspand’. Arjen gaf um het advies um völle mear van dee pöale met camera te plaatsen en dee te verhuren. Der is jums vroage genog, heurden viej.
Den keze-en-wos-oawend brachen toch wier mooi 12 doezend euro op vuur het goo doel. Woer at kleane oondernemmers toch wal wier groot doot. En det anoniem.
Gerard Voortman
