Siepeln sniedn en roetn lapn

Standwoarkers op de Riessense moarkt. Det blif aaltied genieten. Ofgelopen wekke warren ze der wier. Ik volge ze al joaren in de zommervekaansies. Eagenlijk al as wich. Alle moarktkoopleu reupen vroger wal wat. Of ’t non gong um goodkope aardbeien, bananen of vis. De Bé met dee zwoare stemme skreeuwden oonder ’t vis bakken geregeld “Lekkere joh!” En a’j te dichte biej kömmen: “Vot biej det vet. Voort braan-iej oe!”

Iej herinnert oe vaste den kearl met dee tubes Pol: “Voor al uw koper, nikkel, aluminium!” Det was fealijk ook nen standwoarker. Later köm den kearl met autopoets den de motorkappe van zinn auto met wasbenzine in braand steuk en dan wier skone-maakn. Heel spannend. Hele woonderlijke dinge verkochen ze: skearen woe’j ook blik met konn knippen, greunteraspen um ‘n heeln hof duurhen te drukken, zakmesse met ingebouwde gereedschapskiste en siepelsnieders woe’j ook roeten met konn lappen.

Der worden ook nit zo nauw ekekn of de dinge ook wal deugden. Det is aanders ewörden. De standwerkers geewt non vake visitekaartjes met ‘n tellefonnummer a’j klachen hebt. Det gong earder aanders, verteelden miej moarktkoopman Bob Stroeve woer’k met in de jury zat van het leste standwoarkersconcours. Der warren koopleu dee steal goodkope skone verkochen. Mear at de leu in ’t hoes de deuze lösdeedn was der nit één poar hetzelfde: twee verschillende moaten of twee leenkse of twee rechter skone. Det is dan heel komisch, mear at oe oawerkoomp nit. Ook ha’j standwoarkers die sukela verkochen det vear oawer ’n doatum was. Of diepvrieshennen dee ’t al joaren in een diepvries hadden ezetten. Der was der zelfs ene den har hotelbonnen loaten drukken. Dee kree’j dan biej ne woonderpanne. At de leu op vekaansie de hotelbonne metnömmen, wussen de hotelhoolders noarns van. 

Mear de standwoarkers zelf worden ook wal ’s de dupe van de eagen klokigheaid. Van den autopoetskearl worden verteeld det zinn auto ne keer nit wol starten. Hee kreeg van de garage nen leenauto met. Dan kon’e toch zinn autopoets op de motorkappe demonstreern. Det gong heel good, totdet’e dee truc met de wasbenzine dee. Zinn leenauto har nen polyester motorkappe en vleug in ’n braand. 

Det soort koopleu zeent ‘r eagenlijk nit mear, zea Stroeve. A’j de leu biej de bene nemt, is ’t gaauw of-elop. Dan krie’j een moarktverbod. Oewn naam wordt duur de hele branche verspreaid en iej komt noarns mear an bod. Mear de echte artiesten en koopleu zeent ‘r gelukkig nog aaltied. Het is aaltied wier volop genieten, ook al koop iej niks.

Gerrit Dannenberg